Бағдарлама барысында тұрғындарды алаңдатқан өзекті мәселелер көтеріліп, өңірдің қазіргі ахуалы мен алдағы даму бағыттары талқыланды. Сұхбаттың негізгі бөлігі облыс экономикасындағы өзгерістерге арналды.
Облыс әкімінің айтуынша, 2022 жылы Алматы облысы қайта құрылып, дербес өңір ретінде жұмысын бастағаннан бері негізгі экономикалық көрсеткіштер айтарлықтай өскен.
«Облыс құрылған кездегі ішкі өңірлік өнім көлемі 3,5 трлн теңге болса, 2025 жылы бұл көрсеткіш 6,7 трлн теңгеге жетті. Ал салық түсімдері 320 млрд теңгеден 618 млрд теңгеге дейін ұлғайды», – деді Марат Сұлтанғазиев.
Әкімнің сөзінше, экономикалық өсім жаңа жұмыс орындарының ашылуына да оң әсер еткен. Ол облыстың тиімді географиялық орналасуы логистика, өндіріс және сауда салаларын дамытуға мүмкіндік беріп отырғанын атап өтті.
Сұхбат барысында өңір экономикасының құрылымы өзгеріп келе жатқаны айтылды. Бұрын облыста негізгі басымдық ауыл шаруашылығына берілсе, қазір логистика, қойма ісі, өнім өңдеу, өндіріс және қызмет көрсету салалары қарқынды дамып келеді.
Марат Сұлтанғазиев агросектор үлесінің салыстырмалы түрде төмендеуі ауыл шаруашылығы әлсіреп жатыр дегенді білдірмейтінін айтты.
«Бұл – экономиканың әртараптанып келе жатқанын көрсетеді. Басқа салалардың дамуы есебінен өңір экономикасы жаңа деңгейге көтерілді», – деді облыс әкімі.
Қазіргі уақытта облыста ауыл шаруашылығы өнімдерін өңдеу, сақтау және экспорттау бағыттарына ерекше көңіл бөлініп отыр. Әсіресе логистика мен қойма саласының дамуы жаңа жұмыс орындарын ашуға ықпал етуде.
Бағдарлама барысында агротуризм мен экотуризмді дамыту мәселесі де қозғалды. Әкімнің пікірінше, табиғи әлеуеті жоғары Алматы облысы үшін бұл бағыттардың болашағы зор.
