Оқиға Сәтбаев (Советов) шыңында болған. Германия азаматтарынан құралған туристік топ тауға көтерілу кезінде қиын жағдайға тап болған. Туристердің бірінің қолы жарақаттанғаннан кейін олар құтқару қызметіне хабарласып, көмек сұраған.
Құтқару операциясына ҚР ТЖМ «Барыс» республикалық құтқару қызметінің мамандары, Алматы қаласы әкімдігінің мониторинг және жедел әрекет ету орталығының құтқарушылары, сондай-ақ «Қазавиақұтқару» АҚ тікұшағы жұмылдырылды.
Тікұшақ биік таулы аймаққа қонғаннан кейін құтқарушылар зардап шеккен туристке дейін жаяу жетті. Оған алғашқы медициналық көмек көрсетіліп, кейін әуе кемесі қона алатын қауіпсіз жерге жеткізілді.
Жарақат алған Германия азаматы тікұшақпен таудан эвакуацияланып, №4 қалалық клиникалық ауруханаға жеткізілді. Медициналық мекемеде турист дәрігерлерге тапсырылып, қосымша тексеруден өтіп, қажетті медициналық көмек көрсетілді.
Осылайша, құтқарушылардың жедел әрі үйлесімді әрекетінің арқасында биік таудағы құтқару операциясы сәтті аяқталды.
