Ведомство мәліметінше, оқиға арнайы тактикалық дайындық аясында өткен оқу-жаттығу кезінде болған. Жаттығу барысында адам өліміне әкелмейтін қол жарық-дыбыс гранатасы іске қосылған.
Оқиға кезінде гранатаның жарылу аймағына жақын тұрған арнайы бөлімше қызметкерлеріне дереу медициналық көмек көрсетілген. Полиция олардың өміріне қауіп төніп тұрмағанын атап өтті.
Қазіргі уақытта болған жағдайға байланысты қызметтік тексеру басталды. Оның нәтижесі бойынша оқиғаның нақты себептері мен мән-жайы анықталмақ.
Сонымен қатар, Алматы қалалық полиция департаменті әлеуметтік желілерде тараған ақпараттарға түсініктеме беріп, кейбір мәліметтердің шындыққа жанаспайтынын хабарлады.
«Қызметкерлердің жағдайы ауыр екені туралы ақпарат шындыққа сәйкес келмейді», – деп мәлімдеді ведомство.
Полиция азаматтарды тек ресми ақпарат көздеріне сүйенуге шақырып, жалған мәлімет таратқаны үшін заңнамада жауапкершілік қарастырылғанын ескертті.
