Облыс әкімдігінің мәліметінше, жекеменшік электр жеткізуші компаниялардың миллиардтаған теңге көлеміндегі қарызы салдарынан жарықтан ажыратылған тұрғындарға электр энергиясы қайта беріле бастады. Коммуналдық түйткіл Алматы облысы әкімдігі мен «Алатау Жарық Компаниясы» АҚ арасында жүргізілген келіссөздердің нәтижесінде шешілген.
Электр энергиясының өшірілуі елді мекендерді ауыз сумен қамтамасыз ететін су алу ұңғымалары мен сорғы станцияларының жұмысына да әсер еткен. Соның салдарынан тұрғындар жарықпен қатар ауыз су тапшылығына тап болды.
Облыс әкімдігінің мәліметінше, қалыптасқан жағдайға жекелеген электр жеткізуші ұйымдардың «Алатау Жарық Компаниясы» АҚ алдындағы қордаланған берешегі себеп болған. Ең ірі қарыз Қарасай ауданында қызмет көрсететін «BeyAzh Trans» ЖШС-не тиесілі. Кәсіпорынның берешегі 1,1 миллиард теңгеден асады.
Мәселені шешу үшін Алматы облысының әкімі Марат Сұлтанғазиевтің тапсырмасымен облыс әкімінің орынбасары Әсет Масабаевтың төрағалығымен шұғыл кеңес өткізілді. Кездесу қорытындысы бойынша өтелмеген қарызға қарамастан тұрғындарды электр энергиясымен қамтамасыз етуді қайта бастау туралы келісімге қол жеткізілген.
Нәтижесінде Қарасай ауданындағы электрмен жабдықтау 10 маусым күні толық қалпына келтірілді.
Аудан әкімдігінің хабарлауынша, тек мәселенің салдарын жоюмен шектелмей, мұндай жағдайдың қайталануына жол бермеу бағытында да нақты шаралар қабылданды.
Атап айтқанда, «Асыл Арман», «Алтын Ауыл» және «Өмірзақ» тұрғын үй кешендерінің электр желілері «Алатау Жарық Компаниясы» АҚ-ның сенімгерлік басқаруына берілді. Бұл шешім тұрғындарға электр энергиясы үшін төлемдерді делдалсыз, тікелей жеткізуші компанияға төлеуге мүмкіндік береді. Сонымен қатар әрбір тұтынушыға жеке дербес шоттар ашылады.
Сондай-ақ Қарасай ауданы әкімінің өкімімен сумен жабдықтау жүйелері «Таусамалы қызмет» мемлекеттік коммуналдық кәсіпорнының балансына өткізілді.
Ал «BeyAzh Trans» ЖШС-нің берешегі заңнамада көзделген тәртіппен кәсіпорын мүлкін өндіріп алу және сату арқылы өтелетін болады.
Еске салайық, бұған дейін «Алатау Жарық Компаниясы» АҚ төлемдерін ұзақ уақыт өтемеген тұтынушыларға қатысты 8 маусымнан бастап электр энергиясын беруге шектеу енгізілетінін хабарлаған болатын.
