Іс-шара барысында полиция қызметкерлері кәсіпкерлермен бірлесіп, жол қозғалысына қатысушылар арасында түсіндіру жұмыстарын жүргізді. Негізгі мақсат – жүргізушілердің жауапкершілігін арттырып, жолдағы қауіпсіздік талаптарын сақтаудың маңызын түсіндіру.
Тәртіп сақшылары жүргізушілерге жол қозғалысы ережелерін қатаң сақтау, белгіленген жылдамдықты асырмау, қауіпсіздік белдігін тағу және көлікті мас күйінде басқармау қажеттігін ескертті.
Сонымен қатар жүргізушілерге жол қауіпсіздігі жөнінде ақпарат беріліп, күннің ыстығында сергіп алу үшін салқындатылған ауызсу таратылды.
Полиция өкілдері жолдағы қауіпсіздік әрбір азаматтың жауапкершілігі екенін атап өтті. Жол қозғалысы ережелерін сақтау – адам өмірі мен денсаулығын қорғаудың, сондай-ақ жол-көлік оқиғаларының алдын алудың негізгі шарттарының бірі.
Осыған байланысты тәртіп сақшылары тұрғындарды жолда барынша мұқият болуға, белгіленген талаптарды сақтауға және жол қозғалысы мәдениетін бірге қалыптастыруға шақырды.
