Ана мен бала денсаулығын қорғауға бағытталған медициналық мекеме толық жаңғыртылып, заманауи талаптарға сай жұмыс істеуге дайындалған.
Мамандардың мәліметінше, орталық 2007 жылы салынған. 2025 жылы жүргізілген күрделі жөндеу барысында нысанның инженерлік желілері, материалдық-техникалық базасы және инфрақұрылымы толық жаңартылған. Сонымен қатар мекеме жаңа медициналық құрал-жабдықтармен қамтамасыз етілді.
Перинаталдық орталықтың жалпы аумағы 10 800 шаршы метрді құрайды.
№1 Перинаталдық орталық Алматы облысы тұрғындарына тәулік бойы акушериялық-гинекологиялық және неонатологиялық көмек көрсететін мамандандырылған медициналық мекеме саналады. Орталық 110 төсек-орынға арналған және Еңбекшіқазақ ауданы, Райымбек ауданы, Кеген ауданы, Талғар ауданы және Ұйғыр ауданы тұрғындарына қызмет көрсетеді.
Орталықты жаңғырту жұмыстары «Ауылдық денсаулық сақтауды жаңғырту» ұлттық жобасы аясында жүзеге асырылған. Жоба жүкті әйелдерге, босанатын және босанған аналарға, сондай-ақ жаңа туған нәрестелерге көрсетілетін медициналық көмектің сапасы мен қолжетімділігін арттыруға бағытталған.
Медициналық мекемеде:
- мамандандырылған акушериялық көмек;
- шұғыл және жоспарлы гинекологиялық көмек;
- жаңа туған нәрестелерге неонатологиялық көмек;
- әйелдер мен балаларға реанимациялық көмек;
- консультациялық-диагностикалық қызметтер;
- гинекологиялық аурулар бойынша хирургиялық көмек көрсетіледі.
Міндетті әлеуметтік медициналық сақтандыру жүйесі аясында орталықта заманауи диагностикалық, емдік және хирургиялық қызметтер де қолжетімді. Оның ішінде аз инвазивті операциялар, лапароскопия, гистероскопия, жүктілік патологиялары кезінде жасалатын операциялар, күрделі кесарь тілігі, сондай-ақ реконструктивтік-пластикалық және органсақтаушы операциялар жүргізіледі.
Мекеме жаңа диагностикалық және хирургиялық құрал-жабдықтармен жабдықталған. Бұл күрделі операцияларды қауіпсіз жүргізуге және ана мен бала денсаулығын қорғаудың жоғары деңгейін қамтамасыз етуге мүмкіндік береді.
Мамандардың айтуынша, жаңартылған №1 Перинаталдық орталықтың ашылуы Алматы облысындағы босандыру қызметін дамытудағы маңызды қадамдардың бірі болып отыр.
