Жаңа Мәдениет үйі бес гектар аумақта орналасқан. Нысан құрылысына 658,7 млн теңге бөлінді. Ғимаратта 200 орындық көрермендер залы, сахна және түрлі шығармашылық үйірмелерге арналған арнайы кабинеттер қарастырылған.
Мұнда концерттер, театрландырылған қойылымдар, мерекелік және мәдени-көпшілік іс-шаралар ұйымдастырылады. Сонымен қатар домбыра, жыр-терме, ән, би және қолөнер үйірмелері жұмыс істейді. Ақындар мен «Шежіре» тәлім орталығы, ата-әжелер ансамблінің де жұмысын осы жерде ұйымдастыру жоспарланған.
Ауыл тұрғындары жаңа мәдениет ошағының ашылуын көптен күткендерін атап өтті. Олардың айтуынша, елді мекенде балалар мен жастардың шығармашылықпен айналысып, бос уақытын тиімді өткізуіне мүмкіндік беретін заманауи орталық қажет болған.
Соңғы төрт жылда мәдениет саласына 52,6 млрд теңге бағытталды
Мәдениет үйінің ашылу салтанатына қатысқан Алматы облысы әкімінің орынбасары Ғани Майлыбаев жаңа нысан ауылдың мәдени өміріне серпін беретінін атап өтті.
«Бұл – жай ғана жаңа ғимарат емес. Бұл – ауылдың мәдени өмірін жандандыратын, балалар мен жастардың шығармашылық қабілетін дамытуға жол ашатын орта. Мұнда ұлттық өнеріміз бен дәстүріміз дәріптеліп, түрлі буын өкілдері бас қосатын болады», – деді Ғани Майлыбаев.
Оның айтуынша, өңірде мәдени инфрақұрылымды дамытуға ерекше көңіл бөлініп келеді. Соңғы төрт жылда бұл салаға 52,6 млрд теңге бағытталып, 10 жаңа мәдениет нысаны салынған. Бұдан бөлек, 19 мәдениет үйі жөндеуден өткен.
«Мемлекет басшысы мәдениет пен өнердің ел өміріндегі маңызын үнемі айтып келеді. Сондықтан облыста мәдени инфрақұрылымды дамытуға ерекше көңіл бөлінуде. Бұл жұмыс алдағы уақытта да жалғасады», – деді облыс әкімінің орынбасары.
Жібек жолы ауылындағы Мәдениет үйі – соңғы жылдары Алматы облысында пайдалануға берілген жаңа мәдени нысандардың бірі.
Былтыр Кеген ауданындағы Жалағаш және Жылысай, Іле ауданындағы Өтеген батыр, Жамбыл ауданындағы Мәтібұлақ ауылдарында жаңа мәдениет үйлері ашылды. Биыл Жамбыл ауданының Шиен ауылындағы Мәдениет үйінің құрылысы аяқталды. Сондай-ақ демеушілердің қолдауымен Балқаш аудандық тарихи-өлкетану музейінің жаңа ғимараты пайдалануға берілді.
Қазіргі уақытта Қарасай ауданының Әйтей, Жамбыл ауданының Қарғалы және Іле ауданының Боралдай ауылдарында жаңа мәдени нысандар салынып жатыр.
Алдағы уақытта облыста мәдениет үйлерін жаңғырту және жаңа мәдени нысандар салу жұмыстары кезең-кезеңімен жалғасады.
