Министрдің айтуынша, қазіргі уақытта жаңа ойын аймақтарын орналастыру үшін жер телімдерін анықтау және инвесторлар тарту жұмыстары жүргізіліп жатыр.
«Қазіргі уақытта жергілікті атқарушы органдармен бірлесіп жаңа ойын аймақтары үшін жер телімдерін анықтау жұмыстары жүргізілуде. Сонымен қатар, әлеуетті инвесторлармен келіссөздер өтіп жатыр. Әзірге Алматы облысындағы Ақбұлақ аумағы бойынша нақты түсінік бар. Онда белгілі бір инфрақұрылым дайындалған. Басқа өңірлер бойынша жұмыстар жалғасуда», – деді министр.
Оның сөзінше, Алматы облысындағы жаңа казиноны 2027 жылы пайдалануға беру жоспарланып отыр.
Министрдің мәліметінше, жобаны іске асыру үшін ең дайын аумақтардың бірі – Алматы облысындағы Ақбұлақ өңірі.
Қазір мұнда қажетті инфрақұрылымның бір бөлігі қалыптасқан. Бұл инвесторларды тартуға және жобаны қысқа мерзімде іске асыруға мүмкіндік береді.
Айта кетейік, Қазақстанда құмар ойын бизнесі арнайы белгіленген ойын аймақтарында ғана жүргізіледі. Қазіргі таңда мұндай аймақтардың бірі Алматы облысындағы Қонаев қаласы маңында орналасқан.
Жаңа жобалардың іске асуы өңірлерге инвестиция тартуға, туристік инфрақұрылымды дамытуға және жаңа жұмыс орындарын ашуға ықпал етуі мүмкін.
