Ведомство мәліметінше, Қазақстан Республикасының «Табиғи монополиялар туралы» Заңының 24-бабында реттелетін қызметтерге қолжетімділікті қамтамасыз ету тәртібі белгіленген. Норма азаматтар мен кәсіпкерлердің құқықтарын қорғауға, қосылу рәсімдерінің ашықтығын қамтамасыз етуге және табиғи монополия субъектілерінің жауапкершілігін арттыруға бағытталған.
Заң талаптарына сәйкес, табиғи монополия субъектілері өздерінің интернет-ресурстарында бос қуаттар, қосылу шарттары мен қызмет көрсету тәртібі туралы ақпаратты жариялауға міндетті. Бұл тұтынушыларға қажетті мәліметтерді алдын ала алып, қосылу процесін жоспарлауға мүмкіндік береді.
Коммуналдық желілерге қосылу үшін тұтынушы алдымен техникалық шарт алуы қажет. Бұл құжат жаңа нысанды желіге қосу немесе тұтынылатын қызмет көлемін ұлғайту кезінде беріледі және орындалуға тиіс талаптарды қамтиды.
Заңда техникалық шарттарды беру мерзімдері де нақты белгіленген. Атап айтқанда, техникалық жағынан күрделі емес нысандар үшін құжат бес жұмыс күні ішінде, ал техникалық күрделі объектілер үшін он жұмыс күні ішінде рәсімделуі тиіс.
Техникалық шарт талаптары орындалғаннан кейін тұтынушы табиғи монополия субъектісіне нысанның қосылуға дайын екенін хабарлайды. Екі жұмыс күні ішінде мамандар орындалған жұмыстарды тексеріп, талаптарға сәйкестігін анықтайды. Егер заңбұзушылықтар болмаса, реттелетін қызметке қосу үш жұмыс күні ішінде жүзеге асырылады.
Департаменттің мәліметінше, заң тұтынушылардың құқықтарын қорғауға ерекше мән береді. Атап айтқанда, табиғи монополия субъектілеріне бос қуаттар туралы ақпарат бергені үшін ақы алуға, заңда көзделмеген құжаттарды талап етуге, тұтынушыларға тең емес жағдай жасауға немесе техникалық шарттарда көрсетілмеген қосымша талаптар қоюға тыйым салынған.
Ал техникалық шарттарды беруден бас тартуға тек заңда көрсетілген негіздер болған жағдайда ғана жол беріледі. Оларға бос қуаттардың болмауы, инженерлік желілердің өткізу қабілетінің жеткіліксіздігі немесе қажетті инфрақұрылымның жоқтығы жатады.
Мұндай жағдайда табиғи монополия субъектісі бас тарту себептерін ресми түрде негіздеп, уәкілетті органға тиісті ақпаратты жолдауға міндетті. Сонымен қатар тұтынушыға баламалы қосылу жолдары мен орталықтандырылған инженерлік желілерге қосылудың ықтимал мерзімі ұсынылуы тиіс.
Сондай-ақ заң талаптарына сәйкес, техникалық шарттарға табиғи монополия субъектілерімен тікелей келісу арқылы өзгерістер енгізуге болмайды. Бұл талап рәсімдердің ашықтығын қамтамасыз етуге және сыбайлас жемқорлық тәуекелдерінің алдын алуға бағытталған.
