Яғни, өңірдегі әрбір майдангерге шамамен 10 мың АҚШ долларына тең қаржылай көмек көрсетілген.
Қазіргі таңда Алматы облысында соғыстың сұрапыл жылдарын көзімен көрген төрт ардагер тұрады. Олардың ең үлкені – Іле ауданының 103 жастағы тұрғыны Тәңірберген Толғанбаев. Ол 1942 жылы майданға аттанып, Сталинград шайқасына қатысқан.
Ал Ұйғыр ауданының 102 жастағы тұрғыны Алим Кебиров Белорусь майданында Белгород қаласын азат ету операциясына қатысып, ауыр жараланған. Соған қарамастан, 1943 жылы қайтадан майдан даласына оралып, Украина жеріндегі шайқастарға қатысқан.
Еңбекшіқазақ ауданында тұратын Солтанбай Жарықбасов бүгінде 101 жаста. Ал Жамбыл ауданындағы 98 жастағы Федор Ковалев 1945 жылы Жапонияға қарсы соғысқа қатысқан.
Облыс әкімдігінің мәліметінше, майдангерлерге әлеуметтік және медициналық қолдау тұрақты түрде көрсетіліп келеді. Ардагерлер шипажайларда ем қабылдап, дәрігерлердің тұрақты бақылауында болады.
Сонымен қатар Алматы облысындағы 2 038 тыл еңбеккерінің әрқайсысына 64 875 теңге көлемінде біржолғы әлеуметтік көмек беріледі.
Бұдан бөлек, Ленинград қоршауы кезінде еңбек еткен және тиісті марапаттарға ие болған өңірдегі екі азаматқа 86 500 теңгеден төлем қарастырылған.
Сондай-ақ фашистік концлагерьлерде, геттоларда және өзге де мәжбүрлі ұстау орындарында болған азаматтарға да 64 875 теңге көлемінде біржолғы әлеуметтік көмек көрсетіледі.
