Облыс әкімдігінің мәліметінше, өңірде бүгінде төрт соғыс ардагері тұрады. Олардың әрқайсысына мереке қарсаңында 5 миллион теңгеден төлем берілген.
Өңірдегі ең қарт ардагер — 103 жастағы Тәңірберген Толғанбаев. Ол 1942 жылы майданға аттанып, Сталинград шайқасына қатысқан.
Ұйғыр ауданының тұрғыны, 102 жастағы Алим Кебиров Белоруссия стратегиялық операциясы кезінде Белгород қаласын азат етуге қатысып, ауыр жараланған. Соған қарамастан, 1943 жылы қайтадан майданға оралып, Украина аумағындағы шайқастарға қатысқан.
Ал Еңбекшіқазақ ауданында тұратын Солтанбай Жарықбасов биыл 101 жасқа толды.
Өңірдегі ең жас ардагер Жамбыл ауданының тұрғыны Федор Ковалев. 98 жастағы майдангер 1945 жылы Жапонияға қарсы соғысқа қатысқан.
Сонымен қатар, облыстағы 2038 тыл еңбеккеріне 64 875 теңгеден біржолғы әлеуметтік көмек төленді.
Ленинград қоршауы кезінде еңбек еткен және арнайы марапаттары бар екі тұрғынға 86 500 теңгеден қарастырылған.
Сондай-ақ соғыс жылдары фашистік концлагерьлерде, геттоларда және өзге де мәжбүрлі ұстау орындарында болған кәмелетке толмағандарға 64 875 теңге көлемінде әлеуметтік көмек көрсетіледі.
