Төтенше жағдайлар министрлігінің мәліметінше, жеке тұрғын үй иелері ауладан бауырымен жорғалаушыны байқап, 112 қызметіне хабарласқан.
Шақырту бойынша оқиға орнына жедел жеткен құтқарушылар жағдайды бағалап, арнайы құралдардың көмегімен жыланды қауіпсіз түрде ұстап алған. Кейін ол адамдар тұрмайтын, табиғи мекендеу ортасына жіберілді.
Мамандардың айтуынша, мұндай жағдайлар әсіресе жаз мезгілінде жиілейді. Себебі жылы ауа райында жыландардың белсенділігі артып, олар азық іздеп немесе қолайлы орын іздеу барысында тұрғын үйлердің аулаларына, шаруашылық құрылыстарына кіріп кетуі мүмкін.
Осыған байланысты Төтенше жағдайлар министрлігі тұрғындарды қауіпсіздік талаптарын сақтауға шақырады. Егер жылан байқалса, оны өз бетінше ұстауға немесе қуып жіберуге әрекет жасамаған жөн. Сондай-ақ балалар мен үй жануарларын қауіпсіз қашықтықта ұстап, жағдай қауіпті болса, 112 нөміріне дереу хабарласу қажет.
Құтқарушылар табиғаттағы жануарларға зиян келтірмей, адамдардың қауіпсіздігін қамтамасыз ету – осындай оқиғалардағы басты міндет екенін атап өтті.
