Чемпионатқа Қазақстанның әр өңірінен 50-ден астам спортшы қатысады деп күтілуде. Шабандоздар әртүрлі деңгейдегі кедергілерден өтіп, шеберлігі мен дайындық деңгейін сынайды.
Ұйымдастырушылардың мәліметінше, жарыс бағдарламасы балалар, жасөспірімдер, әуесқой және кәсіби спортшылар арасында өтеді. Қатысушылар тек жылдамдық пен техникалық дайындықты ғана емес, тұлпар мен шабандоз арасындағы өзара үйлесімділікті де көрсетуі тиіс.
Конкур – Олимпиада ойындарының бағдарламасына енген ат спортының ең беделді бағыттарының бірі. Бұл спорт түрінде жеңіске жету үшін спортшының кәсіби дайындығымен қатар, атпен өзара сенімі мен түсіністігі ерекше рөл атқарады.
Чемпионаттың ашылуы сағат 10:00-де басталады. Ұйымдастырушылар облыс тұрғындары мен қонақтарын жарысқа келіп, спортшыларға қолдау көрсетуге шақырады.
