ҚР Ішкі істер министрлігінің мәліметінше, арнайы операцияны Есірткі қылмысына қарсы іс-қимыл бөлімінің қызметкерлері жүргізген. Жасырын өндіріс Қарасай ауданы аумағында орналасқан.
Тергеу барысында 29 жастағы ер адамның арнайы жеке үй сатып алып, оны синтетикалық есірткі өндіретін зертханаға айналдырғаны анықталған. Қажетті құрылғылар мен химиялық реагенттер интернет арқылы жеткізіліп отырған. Ал өндіріс процесі интернеттің көлеңкелі сегменті арқылы үйлестірілген.
Тінту кезінде құқық қорғау органдары 28 келіден астам α-PVP синтетикалық есірткісін, 880 литр химиялық прекурсорларды және есірткі өндіруге арналған арнайы зертханалық жабдықтарды тәркілеген.
ҚР ІІМ Есірткі қылмысына қарсы іс-қимыл комитеті төрағасының орынбасары Елдар Әбдікеновтің айтуынша, тәркіленген заттар зертханада өндірілген алғашқы партия болған.
«Оның көлемі шамамен 125 мың бір реттік дозаға тең. Полицияның жедел әрекетінің арқасында есірткінің бірде-бір грамы заңсыз айналымға түскен жоқ», – деді Елдар Әбдікенов.
ІІМ мәліметінше, зертхана өз жұмысын жалғастырған жағдайда өңір тұрғындары үшін үлкен қауіп төндіріп, Алматы облысындағы синтетикалық есірткі таратудың негізгі орталықтарының біріне айналуы мүмкін еді.
Қазіргі уақытта аталған дерек бойынша Қазақстан Республикасы Қылмыстық кодексінің 297-1-бабы бойынша сотқа дейінгі тергеу жүргізілуде. Бұл бап бойынша кінәлі деп танылғандарға өмір бойына бас бостандығынан айыру жазасы қарастырылған.
