Алматы облысы полиция департаментінің мәліметінше, 1984 жылы туған Қараой ауылының тұрғыны өткен жылдың қазан айында өзі тұратын қыстақтағы үйінен шығып кетіп, қайта оралмаған. Ұзақ уақыт бойы хабарсыз кеткен әйелді жақындары өз бетінше іздегенімен, нәтиже болмаған. Кейін жұбайы құқық қорғау органдарына жүгінген.
Жүргізілген іздестіру жұмыстарының нәтижесінде әйелдің мәйіті табылды. Оның нақты неден қайтыс болғаны сот-медициналық сараптаманың қорытындысынан кейін белгілі болады.
Аталған дерек бойынша қылмыстық іс қозғалды.
«Қазіргі уақытта оқиғаның барлық мән-жайын анықтауға бағытталған қажетті тергеу және процессуалдық іс-шаралар кешені жүргізіліп жатыр. Сонымен қатар тиісті сот сараптамалары тағайындалды. Қазақстан Республикасы Қылмыстық-процестік кодексінің 201-бабына сәйкес, тергеу мүддесіне байланысты өзге ақпарат жария етілмейді», – деп хабарлады Алматы облысы полиция департаменті.
Құқық қорғау органдары тергеу аяқталғанға дейін істің өзге мән-жайлары жарияланбайтынын мәлімдеді.
