Қатысушылар арқанмен өрмелеп, биік қабырғалардан асып, лай мен суды еңсеріп, күш пен төзімділікті талап ететін түрлі кедергілерден өтті.
Жарыс биік өрлері бар таулы жерде ұйымдастырылды. Қатысушылар үшін 5 және 10 шақырымдық қашықтықтар қарастырылды. Ең күрделі сынақ 10 шақырымдық трассада болды. Бұл бағытта спортшылар 50-ге жуық түрлі кедергіден өтуге тиіс еді.
Алматы облысының еріктілері мен белсенді жастары трассаның жекелеген учаскелерінде кезекшілік етіп, спортшыларға көмек көрсетті. Қажет болған жағдайда қатысушылардың жағдайы туралы медицина қызметкерлеріне хабарлап, оларды ауыз сумен қамтамасыз етті.
Жарыс барысында қатысушылар мен қонақтарға 23 тамызда өтетін Құрылтай депутаттарының сайлауы туралы ақпарат жазылған су бөтелкелері таратылды. Еріктілер сайлауға қатысты сұрақтарға да жауап берді. Осылайша ауқымды спорттық шара тұрғындар мен қонақтарды алдағы дауыс беру күні туралы ақпараттандыру алаңына айналды.
Балалар үшін де жеке кедергілер жолағы ұйымдастырылды. 7-10 жас аралығындағы қатысушылар 1 шақырым, 11-14 жастағылар 2 шақырым қашықтықты бағындырды. 15 жастан асқан жасөспірімдер 3 шақырымдық ересектерге арналған дистанцияға қатысты. Ұйымдастырушылар ата-аналардың келісімімен дайындығы жақсы кіші жастағы балаларға да мүмкіндік берді. Жарыстың ең жас қатысушысы шамамен бес жаста болды.
Іс-шара өңірдің туризм саласы үшін де маңызды оқиғаға айналды. Алматы облысының Туризм басқармасының мәліметінше, мұндай ауқымды спорттық жарыстар спорттық және оқиғалық туризмнің дамуына серпін береді. Себебі жарысқа спортшылармен бірге олардың отбасы мүшелері мен жанкүйерлері де келеді.
Жарыс қорытындысы бойынша 5 және 10 шақырымдық қашықтықтарда жеңімпаздар анықталды.
«Elite 10» санатында 18-39 жас аралығындағы ерлер арасында ресейлік Дмитрий Горев 1:16:39 нәтижесімен бірінші орын алды. Қазақстандық Алмас Рахымбаев 1:17:38 нәтижесімен екінші, Әли Рахметов 1:19:54 көрсеткішімен үшінші орын иеленді. Әйелдер арасында Анастасия Алексеева 2:10:25 нәтижесімен үздік атанды.
«Elite 5» санатында Қырғызстан өкілі Арсений Шашичев 59:55 нәтижесімен жеңіске жетті. Қазақстандық Дархан Сүйімбаев 1:00:53 көрсеткішімен екінші, Әшім Жұмабеков 1:03:20 нәтижесімен үшінші орын алды. Әйелдер арасында Олеся Грязнова 2:17:25 нәтижесімен үздік болды.
«Elite 10 (40+)» санатында ерлер арасында Ильназ Басыров 1:25:31 нәтижесімен жеңіске жетті. Әйелдер арасында Анастасия Цехотская 2:34:37 нәтижесімен бірінші орын алды.
Командалық жарыста 5 шақырымдық қашықтықта Sprint Club Almaty, ал 10 шақырымдық сайыста Jaubasar Almaty жеңімпаз атанды.
Basqaru Race Nation Kazakhstan 2026 жарысының жалпы жүлде қоры 3 млн теңгені құрады. Іс-шараны «Экстремалды атлетика» қоғамдық бірлестігі ұйымдастырды.
Race Nation жарысы Қазақстанда 2017 жылдан бері өткізіліп келеді. Осы уақыт ішінде балалар санатында жарыса бастаған кейбір қатысушылар бүгінде ересектер арасындағы толыққанды бәсекеге шығып жүр.
