Оқиға Ұйғыр ауданына қарасты Тасқарасу ауылы аумағындағы «Жер көпір» жайылымында болған. Белгісіз адамдар мал қорасынан 43 бас ірі қараны ұрлап кеткен.
Аталған дерек бойынша полиция қылмыстық іс қозғап, жедел-іздестіру шараларын бастаған.
Алматы облысы Полиция департаментінің бастығы Мейрам Әбікеевтің айтуынша, 22 сәуірде жүргізілген жедел іс-шаралар барысында Жетісу облысы Жаркент қаласында күдіктілер ұсталған.
«Алматы облысы Полиция департаментінің Криминалдық полиция басқармасы қызметкерлері Ұйғыр ауданындағы әріптестерімен бірлесіп күдіктілерді ұстады», – деді Мейрам Әбікеев.
Қазіргі уақытта 6 адам ұсталып, олардың ұрланған 43 бас ірі қараны сатып жібергені анықталған. Күдіктілер өз кінәларын мойындаған.
Полиция мәліметінше, күдіктілер уақытша ұстау изоляторына қамалған.
Тергеу барысында олардың өзге де мал ұрлығы фактілеріне қатысы бар-жоғы тексеріліп жатыр. Қазіргі уақытта қылмыстық іс бойынша қажетті тергеу амалдары жүргізілуде.
Полиция мал ұрлығы бойынша күрес күшейтілгенін айтып, тұрғындарды малды қараусыз қалдырмауға және күмәнді жағдайлар туралы құқық қорғау органдарына дер кезінде хабарлауға шақырды.
