24.kz телеарнасының мәліметінше, өрт ошақтары Іле-Алатауы мемлекеттік ұлттық табиғи паркінің аумағында, сондай-ақ Қарадала, Бақанас, Күрті және Қаскелең орман шаруашылықтарында анықталған.
Орман алқаптарындағы өрттің алдын алу мақсатында облыстың барлық аудандарында 13 мобильді топ құрылған. Олар өрт қаупі жоғары кезең басталғалы бері 50-ден астам профилактикалық рейд ұйымдастырған.
Өңірде табиғи өрттердің алдын алу жұмыстарына 1400-ден астам адам жұмылдырылып, олар қажетті техникамен және арнайы құрал-жабдықтармен қамтамасыз етілген.
Алматы облысы Төтенше жағдайлар департаментінің Мемлекеттік өртке қарсы бақылау басқармасының аға инженері Данил Лебедевтің айтуынша, өрт қауіпсіздігі талаптарын сақтамаған азаматтар мен ұйымдарға қатысты заң аясында шаралар қабылдануда.
«Өрт қауіпсіздігі талаптарын бұзып, құрғақ шөптің жануына себепкер болған 21 жеке және заңды тұлға әкімшілік жауапкершілікке тартылды. Оларға жалпы сомасы 1 миллион теңгеден асатын айыппұл салынды», – деді Данил Лебедев.
Мамандар тұрғындарды табиғат аясында демалу кезінде өрт қауіпсіздігі талаптарын қатаң сақтауға шақырады. Әсіресе орман алқаптарында от жағу, жанғыш қалдықтарды тастау және құрғақ шөпті өртеу ауыр зардаптарға әкелуі мүмкін екені ескертілді.
