Мәліметке сәйкес, Жеңістің 80 жылдығына орай республика бойынша 500-ден астам көшеге ардагерлердің есімін беру мақұлданған. Оның ішінде 154 ұсыныс Алматы облысынан түсіп, өңір бұл көрсеткіш бойынша көш бастап отыр.
Қазіргі таңда 73 соғыс ардагерінің есімі аудан және қала көшелеріне берілген. Қалған 81 атау жақын арада өтетін облыстық ономастикалық комиссия отырысында қаралады.
Өткен жылы өңірде 678 көшеге атау беру және қайта атау жұмыстары жүргізілген. Оның 578-і облыстық ономастикалық комиссия отырыстарында талқыланып, қалған 100 көше атауы 29 сәуірде өтетін жиында қаралмақ.
Сондай-ақ 2026-2027 жылдарға арналған Жол картасына сәйкес облыс бойынша 669 көшеге кезең-кезеңімен қайта атау беру жоспарланған.
Өңірде ардагерлер есімін дәріптеу жұмыстары мұнымен шектелмейді. Жеңістің 85 жылдығына орай тағы 116 ардагердің есімін ұлықтау жоспарланып отыр. Бұдан бөлек, облыс бойынша соғыс ардагерлерінің құрметіне 154 мемориалдық тақта орнатылған.
Ономастика саласындағы маңызды өзгерістердің бірі – енді жекеменшік білім беру ұйымдарына тұлғалардың есімін беру немесе атауын өзгерту үшін облыстық ономастикалық комиссияның келісімі міндетті болады.
Бұл талап «Қазақстан Республикасының Тіл туралы» заңына енгізілген өзгерістер аясында жүзеге асырылып жатыр. Осыған байланысты Алматы облыстық Тіл басқармасы тиісті мекемелермен бірлесіп, жаңа заңнамалық нормаларды іске асыру жұмыстарын бастаған.
