Кездесу Қазақстан мен Тәжікстан арасындағы дипломатиялық қарым-қатынастың орнағанына 33 жыл толуына орай ұйымдастырылды.
Кездесу барысында екі ел арасындағы экономикалық байланыстардың тұрақты дамып келе жатқаны айтылды.
Қазіргі таңда Қазақстан Тәжікстанға негізінен астық пен мұнай өнімдерін экспорттайды. Ал Тәжікстан Қазақстанға тоқыма және алюминий өнеркәсібінің өнімдерін жеткізеді.
Өткен жылдың қорытындысы бойынша Алматы облысы мен Тәжікстан арасындағы тауар айналымы 10 пайызға өсіп, 60 миллион АҚШ долларын құрады.
Бүгінде Алматы облысында тәжік капиталының қатысуымен құрылған жеті кәсіпорын жұмыс істейді.
«Тәжікстан – біздің сенімді серіктесіміз»
Марат Сұлтанғазиев Алматы облысы мен Хатлон облысының байланысы соңғы жылдары жаңа деңгейге көтерілгенін атап өтті.
Оның айтуынша, биыл сәуір айында Қазақстан мен Тәжікстан президенттері одақтастық қатынастарды нығайтуға бағытталған құжатқа қол қойған. Бұл өңіраралық ынтымақтастыққа да тың серпін береді.
«Тәжікстан – Алматы облысы үшін маңызды әрі сенімді серіктес. Өңіріміз қуатты аграрлық және өнеркәсіптік әлеуетке, дамыған көлік-логистикалық инфрақұрылымға ие. Біз экономиканы әртараптандыру, жаңа технологияларды енгізу, нарықты кеңейту және гуманитарлық байланысты нығайту бағытында бірлесіп жұмыс істеуге дайынбыз», – деді облыс әкімі.
Инвестиция мен өндірістік кооперацияға басымдық беріледі
Аймақ басшысы Алматы облысының географиялық орналасуы халықаралық сауда үшін үлкен мүмкіндік беретінін атап өтті.
Облыс Қытай және Қырғызстанмен шектеседі, ал арнайы экономикалық аймақтар мен индустриялық инфрақұрылым жаңа инвестициялық жобаларды жүзеге асыруға қолайлы жағдай қалыптастырып отыр.
Сонымен қатар мәдени-гуманитарлық ынтымақтастықты дамыту мәселесіне де ерекше назар аударылды.
Бүгінде Алматы облысында 1525 тәжік этносының өкілі тұрады. Өңірде екі тәжік этномәдени бірлестігі жұмыс істейді. Олар Қазақстан халқы Ассамблеясы мен облыс әкімдігі ұйымдастыратын қоғамдық және мәдени шараларға белсенді қатысып келеді.
Алдағы уақытта студенттер алмасу, бірлескен ғылыми жобалар жүзеге асыру және мәдени іс-шараларды көбейту жоспарланып отыр.
Бірлескен өндірістер ашу ұсынылды
Хатлон облысының төрағасы Давлатали Саид екі өңірдің ынтымақтастығын жаңа деңгейге көтеретін бірлескен жол картасын әзірлеуді ұсынды.
Оның пікірінше, ендігі кезеңде тек сауда байланысын дамытумен шектелмей, бірлескен өндірістер құруға, инновациялық технологияларды енгізуге және өндірістік кооперацияны дамытуға басымдық беру қажет.
«Біз ауыл шаруашылығы өнімдерін терең өңдеу, инновациялық агротехнологияларды енгізу, көлік-логистика саласын дамыту, жасанды интеллект пен «жасыл» технологияларды пайдалану, сондай-ақ білікті мамандар даярлау бағытындағы жобаларды жүзеге асыруға мүдделіміз. Сонымен бірге кәсіпкерлер арасындағы тікелей байланысты кеңейтуді маңызды деп санаймыз», – деді Давлатали Саид.
Кездесу қорытындысында тараптар өзара тиімді серіктестікті одан әрі нығайтуға дайын екендерін білдірді. Жоспарланған бірлескен жобалар сауда, инвестиция, өнеркәсіп, білім беру және мәдениет салаларындағы байланысты жаңа деңгейге көтеруге мүмкіндік береді.
