Әкімнің сөзінше, бүгінде өңір экономикасында экспортқа бағытталған өндірістерді дамытуға басымдық берілуде. Әсіресе ауыл шаруашылығы өнімдерін өңдеу саласында ірі кәсіпорындар саны көбейіп келеді.
Солардың бірі – Алматы облысында орналасқан «Шин-Лайн» кәсіпорны. ТМД аумағындағы ірі балмұздақ өндірушілердің бірі саналатын зауыт өткен жылы 15 мың тонна өнім экспорттаған.
«Бұрын импорт көлемі жоғары болса, бүгінде қазақстандық өнімнің экспорттағы үлесі артып келеді. Бұл – өңдеу саласының дамып жатқанын білдіреді», – деді облыс әкімі.
Сұхбат барысында аймақ басшысы салыстырмалы түрде Ресейдегі балмұздақ зауыттарының жалпы экспорт көлемі шамамен 17 мың тоннаны құрайтынын айтты. Оның сөзінше, Қазақстандағы бір ғана «Шин-Лайн» кәсіпорнының 15 мың тонна өнім экспорттауы саладағы өсімнің айқын көрсеткіші.
Әкімнің пікірінше, мұндай нәтижелер Алматы облысының өндірістік әлеуетін күшейтіп қана қоймай, жаңа жұмыс орындарын ашуға, салық түсімін арттыруға және экономиканы әртараптандыруға да ықпал етеді.
Қазір облыста өнім өңдеу, логистика және қойма ісі бағыттары да қатар дамып келеді. Бұл салалар экспорттық мүмкіндікті кеңейтіп, дайын өнім өндіру көлемін арттыруға негіз болып отыр.
Облыс әкімінің айтуынша, өңірдің негізгі мақсаты – шикізат өндірумен ғана шектелмей, халықаралық нарықта бәсекеге қабілетті дайын өнім шығаратын өндірістік орталыққа айналу.
