Жарыстың салтанатты ашылу рәсімінде Қарасай ауданы әкімінің орынбасары Азамат Жандосов қазақ күресінің ұлттық құндылық ретіндегі маңызын атап өтті.
«Қазақ күресі – халқымыздың тарихы, мәдениеті мен салт-дәстүрінің ажырамас бөлігі. Бұл спорт түрі қайсарлыққа, қарсыласқа құрмет көрсетуге, мінездің беріктігіне және Отанға деген сүйіспеншілікке тәрбиелейді. Бүгінгі турнир – күш пен шеберліктің мерекесі», – деді ол.
«Нұр-Аман» спорт кешенінде өткен жарысқа абсолюттік салмақ дәрежесіндегі 29 үздік балуан қатысты. Кілемге аудандық және қалалық іріктеу кезеңдерінің жеңімпаздары, жасы 18-ден асқан әрі салмағы 90 келіден жоғары спортшылар шықты.
Турнирдің алғашқы айналымдарынан-ақ белдесулердің өте тартысты өтетіні байқалды. Әрбір палуан үшін бұл жарыстың маңызы зор болды, өйткені жеңімпаздарға еліміздегі ең беделді ұлттық күрес додасы – «Қазақстан Барысына» жолдама берілді. Ширек финал мен жартылай финал кездесулерінде балуандар түрлі әдіс-тәсілдерін шебер қолданып, көрермендерге жоғары деңгейдегі тартысты белдесулер сыйлады.
Турнирдің бас төрешісі Қапар Рауанов биылғы жарыстың деңгейіне жоғары баға берді.
«Биылғы турнирдің басты ерекшелігі – тәжірибелі балуандар мен жас спортшылар арасындағы тартысты бәсеке. Әрбір белдесу жоғары деңгейде өтті. Осындай жарыстар ғана шын мықтыны анықтайды», – деді бас төреші.
Турнирдің басты сенсациясы Қазақстан Республикасының спорт шебері, қазақ күресінен бірнеше дүркін Қазақстан чемпионы Нұрғали Жолтаевтың жеңісі болды. Финалда Еңбекшіқазақ ауданының намысын қорғаған балуан халықаралық дәрежедегі спорт шебері, қазақ күресінен Әлем кубогының жеңімпазы, Қонаев қаласының өкілі Мәди Еділбаевты жеңіп, облыс чемпионы атанды.
Жеңімпаз Нұрғали Жолтаев бұл жетістіктің артында ұзақ жылғы еңбек тұрғанын айтты.
«Әрбір жеңістің артында күнделікті жаттығу, темірдей тәртіп және бүкіл команданың еңбегі жатыр. Маған сенім артқан жаттықтырушыларыма және қолдау көрсеткен жанкүйерлерге алғыс айтамын. Бұл жеңіс – келесі белеске бастар жол. Ендігі мақсатым – «Қазақстан Барысында» Алматы облысының намысын лайықты қорғау», – деді ол.
Жарыс қорытындысы бойынша Нұрғали Жолтаев символикалық «Алтын белбеуге» ие болып, 2 миллион теңге көлеміндегі ақшалай сыйлықпен марапатталды. Күміс жүлдегер Мәди Еділбаевқа 1 миллион теңге табысталды. Екі балуан да Алматы облысының атынан республикалық «Қазақстан Барысы» турнирінде белдеседі.
Ал қола жүлде Қонаев қаласының спортшысы Тәңірберген Бекнұрға бұйырды. Ол да ақшалай сертификатпен марапатталды.
Облыстық турнир тағы бір мәрте Алматы облысында қазақ күресінің қарқынды дамып келе жатқанын көрсетті. Енді жанкүйерлердің назары 15 тамызда өтетін республикалық «Қазақстан Барысы» турниріне ауып отыр. Онда облыс балуандары елдің ең үздік палуандарымен күш сынасып, өңір абыройын қорғауға мүмкіндік алады.
