ЮНЕСКО-ның мерейтойлық даталар күнтізбесіне енгізілген бұл айтулы шара халықаралық деңгейдегі мәдени бағдарлама аясында өтті. Көрермендер залын толтырған жұртшылық кешті ыстық ықыласпен қабылдап, өнер иелеріне зор қошемет көрсетті.
Концерт барысында Қазақстанның Ресей Федерациясындағы Төтенше және Өкілетті Елшісі Дәурен Абаев сөз сөйлеп, Нұрғиса Тілендиевтің шығармашылық мұрасына тоқталды.
«Ол қобыз бен домбыраның көне күйлері мен заманауи симфониялық формаларды тоғыстырған алтын көпір бола білді. Оның музыкасы – ғасырлар үнқатысы. Онда дала әуендері, қаһармандық сарындар, халықтық әуез бен академиялық мектеп үйлесім тапқан. Шығармашылығы халқымыздың жады мен болмысын сақтаудың, рухани қуатты нығайтудың жолы», – деді Елші.
Көрерменнің ерекше ықыласына композитордың қызы, дирижер, Қазақстанның еңбек сіңірген мәдениет қайраткері Дінзухра Тілендиеваның өнері бөленді.
«Мәскеу – әкеме жат қала емес. Ол осында Николай Аносовтан дәріс алып, Үлкен театрда тағылымдамадан өткен. Сондықтан біз бұл концертке үлкен дайындықпен келдік. Әкемнің есімін ұлықтап, мерейтойлық жылы осы сахнада өнер көрсету – мен үшін зор мәртебе», – деді ол.
Шара аясында театр фойесінде Жамбыл Жабаев атындағы Әдеби-мемориалдық музей қорынан әкелінген жәдігерлер көрмесі де ұйымдастырылды. Музей директоры, ұлы ақынның немересі Салтанат Жамбылова 1936 жылы дәл осы Мәскеуде Жамбыл бүкілодақтық танымалдылыққа ие болғанын атап өтті.
Мерейтойлық кеш Алматы облысы әкімдігі мен Қазақстан Республикасының Ресей Федерациясындағы Елшілігінің қолдауымен өтті. Ұйымдастырушылардың айтуынша, концерт пен көрме Мәскеу жұртшылығына қазақ мәдениетінің бай мұрасын танытып, ерекше әсер қалдырды.
