Негізгі шаралар Өтеген батыр ауылының орталық стадионында ұйымдастырылып, оған аудан тұрғындары мен қонақтар қатысты.
Салтанатты бөлім Мемлекеттік Әнұраннан басталды. Аудан әкімінің орынбасары Асқар Садықов жиналғандарды мерекемен құттықтап, қоғамдық келісім мен ұлтаралық бірліктің маңызын атап өтті.
Іс-шара аясында ауданның әлеуметтік-экономикалық дамуына үлес қосқан азаматтарды марапаттау рәсімі өтті. Өндіріс, бизнес, қоғамдық ұйымдар және құқық қорғау саласының өкілдері арнайы алғыс хаттармен және марапаттармен наградталды.
Сонымен қатар, Іле ауданында футбол маусымы ресми түрде ашылды. Ересек командалар арасындағы аудан біріншілігі басталып, Қазақстан халқының бірлігі күніне арналған аудан әкімінің кубогы үшін турнирге старт берілді. Жарысқа барлық ауылдық округтердің командалары қатысты.
Командалардың шеруінен кейін жаңа маусымның алғашқы матчтары өтті. Ашылу ойынында Ақши ауылы мен Өтеген батыр ауылдық округінің командалары кездесті.
Мерекелік атмосфераны жергілікті өнерпаздардың концерттік бағдарламасы толықтырды.
Айта кетейік, Іле ауданы – көпұлтты келісім қалыптасқан өңірлердің бірі. Мұнда 20-дан астам этнос өкілдері тұрады, ал жалпы халық саны шамамен 242 мың адамды құрайды.
Ұйымдастырушылардың айтуынша, мұндай іс-шаралар қоғамдық бірлікті нығайтып қана қоймай, бұқаралық спортты дамытуға және тұрғындардың белсенділігін арттыруға ықпал етеді.
