2025 жылы «Келешек мектептері» ұлттық жобасы аясында өңірде қазірдің өзінде сегіз жаңа мектеп ашылған. 15 желтоқсанға дейін тағы тоғыз білім ұясы оқушыларды қабылдайды. Соның нәтижесінде үш ауысымды мектептердің саны 28-ден 23-ке дейін қысқарады. Жаңа мектептер Талғар, Іле, Қарасай, Еңбекшіқазақ аудандарында және Алатау қаласында бой көтеруде.
Алматы облысының білім басқармасының басшысы Арайлым Төлебекованың айтуынша, барлық жаңа нысандар заманауи стандарттарға сай салынып жатыр:
«Біздің мақсат – әр баланың мектепте жайлы болуын және сапалы білім алуын қамтамасыз ету. Жаңа мектептер қазіргі талаптарға толық сәйкес келеді», – деді ол.
«Келешек мектептері»: біркелкі стандарт және жаңа мүмкіндіктер
Жоба аясында мектеп инфрақұрылымына ортақ бірыңғай стандарт енгізілген. Заманауи мектептердің түлектері халықаралық деңгейдегі байқауларда жоғары нәтиже көрсетіп жүр.
Мәселен, Қаскелең қаласының оқушысы Қасымхан Сәрсенбай робототехникадан Азия чемпионатында жүлделі орын алған.
«Біз жасанды интеллектті архитектурада пайдалану жобасын дайындап жатырмыз. Қолданба ІІ көмегімен құрылыс материалдарын таңдап, ғимараттың 3D-моделін жасайды», – дейді жас өнертапқыш.
Ал Қаскелең тұрғыны Күміс Асубаева жаңа мектептегі жағдайға риза:
«Балалардың дамуы үшін барлық жағдай жасалған: заманауи асхана, түрлі үйірмелер, спорт секциялары бар. Балаларым да, немерелерім де осында оқиды», – дейді ол.
Өңірдегі барлық мектептер жылыту маусымына толық дайын
Облыстық білім басқармасының мәліметінше, өңірдегі барлық мектеп пен балабақша жылыту маусымына толық дайындалған. Қажетті нысандарда қазандықтар мен сорғылар жаңартылды.
Сонымен қатар 215 мектепке «Бизнес әмиян» жүйесі мен оқушылардың тамақтануын бақылауға арналған аппараттық-бағдарламалық кешен енгізілді.
