Бұл нысанның іргесі 1981 жылы қаланған. Алайда 2010 жылдан бері санаторий тонауға түсіп, жарамсыз күйге ұшыраған. Бүлінген нысанды қайта қалпына келтіруге 500 млн теңге инвестиция құйылды. Емдеу-сауықтыру орталығы Ресей, Германия, Швейцарияның алдыңғы қатарлы технологиясымен жабдықталған.
Мұнда адамдар нейрологиялық және жарақат ауруларынан кейін қосымша ем қабылдай алады. Келушілер физиотерапия, парафинмен, батпақпен, оттегімен, бумен емдеу шараларын қабылдап, тұзды шахта, хамам монша, сауна, бассейн, фито-бар қызметін пайдалануға мүмкіндігі бар.
«Ізгілікті істің жүзеге асуы өңір тұрғындарын сапалы медициналық қызметпен қамтамасыз етіп, «Саламатты Қазақстан» жобасын жүзеге асыруға өз үлесін қосатынына сенімдімін», — деді ашылу салтанатында Қарасай ауданының әкімі Рустам Атшабаров.
Санаторий бір мезгілде 80 адамды қабылдай алады, мұнда 30 қызметкер еңбек етеді. Демалушылар үшін бір және екі кісілік бөлмелер мен «люкс» дәрежелі номерлер жабдықталған.
