Президент халықтың тұратын жеріне қарамастан, газбен қамтуды қоса алғанда, базалық инфрақұрылымға тең қолжетімділігін қамтамасыз етудің маңызын ерекше атап өткен болатын.
Мұнай-газ кешені қызметкерлері күніне арналған салтанатты жиында Алматы облысы әкімінің орынбасары Рустам Исатаев өңірде қол жеткізілген нәтижелер мен алдағы жоспарлар туралы баяндады.
Бүгінгі таңда облыстағы 284 елді мекеннің 158-і немесе 55,3 пайызы газ жүйесіне қосылған. Соның нәтижесінде 1,2 миллионнан астам тұрғын, яғни халықтың 77 пайызы табиғи газды пайдаланып отыр.
«Өткен жылдың өзінде ғана 17 елді мекенге газ тартылып, 40 мыңнан астам адамның өмір сапасын едәуір жақсартуға мүмкіндік берді. Қазіргі таңда тағы 18 ауыл мен қала массивін газдандыру жобалары дайындалды. Оларды жүзеге асыру барысында 600 уақытша және 20 тұрақты жұмыс орны ашылады», – деді Рустам Исатаев.
Оның айтуынша, 2025 жылы облыстық бюджеттен 11 миллиард теңге бөлініп, 14 елді мекен газбен қамтылады. Нәтижесінде келесі жылдың соңына қарай өңірдегі газдандыру деңгейі 59,5 пайызға жетіп, 169 елді мекенге табиғи газ жеткізілмек.
Іс-шара соңында энергетика саласында жоғары кәсібилік танытып, өңірдің дамуына зор үлес қосқан ондаған маман мемлекеттік және өңірлік наградалармен – медальдармен, Құрмет грамоталарымен және алғыс хаттармен марапатталды.
