Форум 8 қараша күні Ұзынағаш ауылында өтті. Іс-шара Қазақстан Республикасы Президентінің жанындағы Әйелдер істері және отбасылық-демографиялық саясат жөніндегі ұлттық комиссияның, «Ауыл» партиясының және облыс әкімдігінің ұйымдастыруымен өтті.
Ұйымдастырушылардың айтуынша, форумның негізгі мақсаты – ауылдық жерлердегі әйелдердің көшбасшылық әлеуетін нығайту және олардың кәсіпкерлікке, білімге, әлеуметтік қолдауға қолжетімділігін кеңейту.
Бұл бастама Мемлекет басшысы Қасым-Жомарт Тоқаевтың ауылды дамытуға бағытталған саясатының аясында жүзеге асып отыр.
Форумның ашылуында Алматы облысы әкімінің орынбасары Ғани Майлыбаев, Жамбыл ауданының әкімі Нұрлан Ертас, Ұлттық комиссия мүшесі Айгерім Сарсенбаева және «Ауыл» партиясы төрағасының орынбасары Ғалымжан Құсманғали сөз сөйледі.
Пленарлық отырыста «Ауылдық жерлердегі әйелдердің әлеуметтік-экономикалық мүмкіндіктерін кеңейту» тақырыбы талқыланды. Қаржыландыру, гранттар, жеңілдетілген несие, ауыл кәсіпкерлігін қолдау және экспортқа бағытталған жобаларды дамыту мәселелері көтерілді.
-
Кәсіпкерлік басқармасы мемлекеттік гранттар мен жеңілдетілген несие шарттарын таныстырды
-
Жұмыспен қамтуды үйлестіру басқармасы әлеуметтік төлемдер мен қайтарымсыз жәрдемақы бағдарламалары туралы баяндады
-
Ауыл кәсіпкерлері кооперацияның маңызын айтты
-
Әйелдер кәсіпкерлігін дамыту кеңесі әйелдердің экономикалық өсімге қосатын үлесін атап өтті
Форум аясында ауыл әйелдері жасаған қолөнер және ауылшаруашылық өнімдерінің көрмесі өтті.
Форумда айтылған ұсыныстар мен шешуді қажет ететін мәселелер жинақталып, ҚР Президенті жанындағы Ұлттық комиссияның сараптамалық базасына енгізіледі. Ұйымдастырушылардың айтуынша, ұсыныстар орталық мемлекеттік органдарға жолданады.
