Жол инфрақұрылымын жаңарту жобасы халықаралық көлік дәліздерін реконструкциялауды, жаңа автомагистральдар салуды, сондай-ақ республикалық және өңірлік жолдарды күрделі әрі орташа жөндеуден өткізуді көздейді.
Қазіргі уақытта жалпы ұзындығы 4 мың шақырымды құрайтын 126 жол учаскесінде құрылыс және жөндеу жұмыстары жүргізіліп жатыр.
Алматы облысы үшін маңызды жобалардың бірі – Алматы – Шелек – Қорғас автожолын жаңғырту. Бұл бағыт Қазақстан мен Қытай арасындағы халықаралық көлік-логистикалық дәліздің маңызды бөлігі саналады және жүк пен жолаушылар тасымалының қарқынын арттыруға мүмкіндік береді.
Бұдан бөлек, ел аумағында Жезқазған – Петропавл, Атырау – Орал және Жаңаөзен – Кендірлі – Түрікменстан шекарасы бағыттарындағы автожолдар да жаңартылып жатыр.
Сонымен қатар, Көлік министрлігі автомобиль жолдарын орташа жөндеуге қатысты нормативтік құжаттарға өзгерістер енгізді. Жаңа талаптарға сәйкес, жөндеу жұмыстары кезінде суық ресайклинг технологиясы кеңінен қолданылады. Бұл әдіс жол жабынындағы материалдарды қайта пайдалану арқылы жөндеу сапасын арттырып, құрылыс шығындарын азайтуға мүмкіндік береді.
Сондай-ақ көлік қозғалысы аз жолдарда жол төсемінің баламалы конструкцияларын пайдалану көзделген. Мамандардың айтуынша, бұл тәсіл өңірлік жолдардың сапасын жақсартып, оларды күтіп ұстауға жұмсалатын шығынды азайтуға ықпал етеді.
Жолдарды жаңғырту жұмыстары елдің көлік инфрақұрылымын дамытуға, өңірлер арасындағы байланысты нығайтуға және халықаралық транзиттік әлеуетті арттыруға бағытталған.
