Тарифтер мен инвестициялық жобалар
Жылу, электр және су жүйелерін жаңғырту «Тарифті инвестицияға айырбастау» бағдарламасы аясында жүзеге асырылуда. Бағдарлама бойынша биыл:
•Сумен жабдықтау және су бұру қызметтері бойынша – 50,51 млн теңге,
•Жылумен жабдықтау бойынша – 114 млн теңге,
•Электроэнергия тасымалдау бойынша – 38,553 млн теңге игерілген.
Бағдарлама аясында жөнделген желілер мен жаңғыртылған жүйелер тозуды азайтып, қызмет сапасын арттыруға мүмкіндік береді.
Тариф құбылмалығы және бақылау
Электр энергиясының тарифі 28,64 теңгеден 31,36 теңгеге өскенімен, тарифтерді реттеу және бақылау арқылы тұтынушыларға 194 млн теңге қайтарылған. Табиғи монополия субъектілерінің қызметі талданып, уақытша өтемдік тарифтер бекітілді.
Жылу жүйелерін жаңғырту және инфрақұрылымдық жобалар
Энергетика және энергия үнемдеу бөлімінің басшысы Ержан Бейбітұлының айтуынша, өңірде 43 қазандық жөнделді, ал Талғар ауданында 53 блок-модульді қазандық салу жобасы дайын тұр. Бұл жоба толық іске асқан жағдайда, 110 көпқабатты тұрғын үй орталықтандырылған жылумен қамтамасыз етіледі.
Сонымен қатар, облыста 10 қосалқы станцияның құрылысы жоспарланған. Жобаның жалпы инвестициялық көлемі 100 млрд теңгеге жетіп, электр энергиясының үздіксіз берілуін қамтамасыз етеді.
Сапалы қызмет – басты назарда
Облыстағы жылу-энергетикалық инфрақұрылымды жаңғырту жұмыстары аймақ тұрғындарына сапалы қызмет көрсетуді және жүйенің тұрақты жұмыс істеуін қамтамасыз етуді мақсат етеді.
