Өз құттықтауында министр ана бейнесінің қазақ мәдениеті мен қоғамындағы орны айрықша екенін атап өтті.
«Ананың ақылы мен өнегесі, сабыры мен мейірімі арқылы ұрпақтан ұрпаққа құрмет, ізет, жанашырлық, жауапкершілік сияқты асыл құндылықтар жалғасып келеді. Бұл құндылықтар – халқымыздың рухани тұтастығы мен елдігіміздің берік негізі», — деді Аида Балаева.
Министрдің айтуынша, Қазақстанда ана мен баланы қорғау бағытында жүйелі жұмыстар жүргізіліп жатыр. Атап айтқанда, әлеуметтік қолдау жүйесін дамыту, мектепке дейінгі білім беру сапасын арттыру және «Жауапты ата-ана» бағдарламаларын ілгерілету көзделген.
Сондай-ақ Аида Балаева ананың шексіз махаббаты мен қолдауы бала өміріндегі ең үлкен құндылықтардың бірі екенін атап өтті.
«Аналарымыз аман, шаңырақтарымыз шаттыққа толы болсын! Анамызбен бірге өткізген әрбір сәттің қадірін терең сезіндіретін мерекемен баршаңызды шын жүректен құттықтаймын! Отбасыларыңызға жылулық, махаббат, береке-бірлік пен амандық тілеймін», — деп түйіндеді сөзін министр.
