Құрметті жасына қарамастан, ол ел үшін маңызды науқанға жеке қатысуды жөн көрген. Ардагер сайлау учаскесіне туыстарымен бірге келді.
Төрткен Кененова — өңірге кеңінен танымал тұлға. Ол халық ақыны, композитор және күйші Кенен Әзірбаевтың қызы. Саналы ғұмырын еңбекке арнап, ел құрметіне бөленген азамат. Ол — Іле ауданының Құрметті азаматы, Қазақстан Республикасының Құрметті өнер қайраткері, еңбек ардагері әрі қоғам белсендісі.
Жақында Төрткен Кененова 90 жасқа толды. Ол 1936 жылы Жамбыл облысы Красногор ауданындағы Отар теміржол станциясында дүниеге келген. Қазіргі әкімшілік бөлініс бойынша бұл аумақ Қордай ауданына қарайды.
Бала күнінен музыка мен халық шығармашылығына жақын болып өскен Төрткен Кененова өнерге деген сүйіспеншілікті әкесі Кенен Әзірбаевтан дарытқан. Кейін ол әкесінің мол мұрасын сақтау жолында ауқымды жұмыс атқарды. Атап айтқанда, Кенен Әзірбаевтың әндерін «Қосылған қоңыр қазға ән мен үнім» және «Әнім қалсын» атты компакт-дискілерге жаздырып, жарыққа шығарған. Соның арқасында халық композиторының көптеген шығармасы қайта жаңғырып, кең тыңдарманға жол тартты.
Төрткен Кененова өмірінің елеулі бөлігін педагогика саласына арнады. Ол 30 жыл бойы халыққа білім беру жүйесінде еңбек етті. Ұзақ жылғы еңбегі мемлекет тарапынан жоғары бағаланып, 1981 жылы «КСРО халық ағарту ісінің үздігі», ал 1985 жылы Қазақстанның халық ағарту ісінің үздігі төсбелгілерімен марапатталған.
Қазіргі таңда да Төрткен Кененова белсенді өмір салтын ұстанып келеді. Сайлау учаскесіне келген ардагер қоғамдық өмірге араласу мен азаматтық ұстанымды білдіру әр адам үшін маңызды екенін атап өтті. Сонымен қатар ол қарттарға көрсетіліп жатқан құрмет пен қамқорлық үшін ризашылығын жеткізді.
Дауыс бергеннен кейін Төрткен Кененова жиналғандарға ақ батасын беріп, тұрғындарға бірлік, келісім және амандық тіледі. Учаскеге келген азаматтар ардагердің жылы сөзін зор құрметпен қабылдады.
