7 айлық қазақстандық бала Ресей Федерациясынан елге оралды, деп хабарлайды alataunews.kz тілшісі Оқу-ағарту министрлігінің Балалардың құқықтарын қорғау комитетіне сілтеме жасап.
Комитет мәліметінше, бүлдіршін елге келген бойда балалар ауруханасына қаралып, медициналық тексеруден өтті. Қазіргі уақытта баланың жағдайы тұрақты. Медициналық шаралар аяқталған соң, ол «Балалар үйі» КММ-не жіберіледі. Балаға елге оралу процесінде әдіскер-қамқоршы мен анестезиолог-реаниматолог көмектесті.
Қазақстанның Оқу-ағарту министрлігі Балалардың құқықтарын қорғау комитетінің төрайымы Насымжан Оспанова: «Біз үшін әрбір баланың қажетті қолдау алуы маңызды. Әр азаматымызға қамқорлық көрсету және қауіпсіздігін қамтамасыз ету үшін жұмыс істеп жатырмыз. Комитет кішкентай нәрестені елге қайтару үшін тиісті органдармен және мамандармен бірлесіп жұмыс атқарды. Ол үшін білікті мамандар барынша көмектесетін болады,» – деп атап өтті.
Ведомство балалардың қауіпсіздігі мен әл-ауқатын қамтамасыз етіп, олардың құқықтары мен мүдделерін қорғау жөніндегі белсенді жұмыстарын жалғастырып жатқанын мәлімдеді. «Біз қажет болған жағдайда балаларды Отанына қайтару үшін бар күшімізді саламыз және олардың кәсіби мамандардың қамқорлығында болуын қамтамасыз етеміз,» – делінген хабарламада.
