Игі бастаманың арқасында өнімнің түсімі 2 есеге артпақ. Алайда сапасы жоғары, төзімділігі мықты, дәмі тіл үйіретін жемістерді шығару үшін 20 жылға жуық уақыт кетеді екен.
Бүгінде еліміздің мемлекеттік тізбесіне 202 жеміс дақылы мен жүзім сорты енгізілген. Мамандардың айтуынша 1937 жылдан бері көп түрі ескірген. Бірақ соңғы 30 жылда институт қызметкерлері 150-ден аса алма, 50-ден аса алмұрт, 80-нен аса жүзім түрін шығарыпты. Қазір қорда 2 мыңға жуық жаңа сорт бар. Ал биыл өндіріске енгізілетін жеміс-жидектің 5 түрі шаруа қожалықтарының 1 гектар аумағынан 45 тоннаға жуық өнім бермек. Бұрын көрсеткіш әлдеқайда төмен болған.
«Биыл тамызда бақша құлпынайы мен қарабүлдіргеннің вирустан тазартылған жаңа сортын отырғызамыз. Бірақ, бұл өнім тауар ретінде сатылымға шығарылмайды. Ол жидектің сапасы жоғары генетикалық түрі ретінде сақталады. Тек үшінші мәрте репродукцияланғаннан кейін ғана өнім беруге дайын болады», – деді «Қазақ жеміс-көкөніс шаруашылығы ғылыми-зерттеу институты» ЖШС зертхана меңгерушісі Светлана Долгих.
Жаңа сорттардың тағы бір ерекшелігі – түрлі аурулар мен зиянкестерге төзімді келеді.
«Сорттарға қазақша ат береміз. Ұзақ жылдан бері еңбегі сіңген селекционер мен ғалымдардың атымен де атаймыз. Мысалы «Людмила» сорты біздің институтта талай жыл істеген селекционердің атына қойылған. «Мақсат», «Күләш», «Есин» деген өзіміздің жергілікті жердің атына сай, сонымен қатар өзінің еліне сай қою керек», – деді «Қазақ жеміс-көкөніс шаруашылығы ғылыми-зерттеу институты» ЖШС басқарма төрағасының орынбасары Сәуле Қазыбаева.
Алайда мамандар ауыл шаруашылығы саласында бірқатар түйткілдің бар екенін де жасырмайды. Маман тапшылығы мен қаржы мәселесі қол байлап тұр. Сондықтан, отандық көшеттерге субсидия көлемі артса деген тілек білдірді.
