Жобаның мақсаты күн станцияларының шығындарын өтеу арқылы тиімділікті арттыру. The Future Solаr Power Plant деп аталатын қалқымалы күн панелінің ерекшелігі арнайы қалқымалы платформаның көмегімен жер бетіне емес, су бетіне орнатылады.
Нәтижесінде күн сәулесі суға шағылысып, энергия өндірісі артады. Жас өнертапқыш бұл жобаны 7-сыныптан дамытып келе жатыр екен.
2023 жылы «Тәуелсіздік ұрпақтары-2023» жобасы аясында 3 млн грантын жеңіп алып, биыл мақсатын жүзеге асырып, заманауи әрі ақылды күн панельдерін іске қосты.
Неге ақылды? Себебі, арнай күн трекерлері орнатылған. Олар күннің бағытын бақылап, күн ұясына батқанша бұрылып отырады және түн батқанда өздігінен сөнеді. Сонымен қатар, тағы бір артықшылығы дербес тазалау құрылғыларымен жабдықталған. Сол арқылы 95%-ға көбірек энергия өндіреді.
Ал қарапайым біз қолданып жүрген күн панельдерінің қуаттылығы төмен және қанша энергия өндірсе, сонша энергия жұмсайды. Сондықтан тиімсіз дейді жас ғалым.
«Өздеріңіз білесіздер жасыл энергия ол ең таза әрі қауіпсіз энергияға жатады. Біз әлі күнге дейін энергияны көмірден алып отырмыз. Ал күн панельдерінің қуаттылығының төмендігі оларды кең ауқымда қолдануға тиімсіз етеді. Мен осы Қазақстандағы энергия тапшылығын жасыл энергияның көмегімен шешкім келеді. Жасыл энергияны дамыту арқасында біз атмосфераға парниктік газдың шығаруын тоқтатып, климаттың өзгеруін азайтамыз. Жаңартылған энергия қоршаған ортаны ластамайды және сарқылмайды. Ал қазба отындар ерте ме, кеш пе таусылады. Сондықтан күн көзінен барынша көп энергия өндіріп, оны қолдану жолдарын жақсарту арқылы қарапайым күн станцияларының шығындарын өтейміз, нәтижесінде тиімділік артады», — деп атап өтті Қанат Тәжіхан.
Жастайынан жобалау және инженерия, IT, автоматтандыру саласына қызығып, экологиялық әрі социологиялық мәселелерді шешуге атсалысып келеді.
«Тұрақты жол» ұлттық әлеуметтік эконауқаны Республикалық эко-стартап сайысының 2 млн грант иегері атанды.
Экология министрлігінің тарапынан ең үздік экологиялық жоба атағымен 1 орынды жеңіп алды.
Осы ретте Қанатқа барынша қолдау көрсетіп келе жатқан, көкесі Минаж Мұхамеджан оның өте талантты әрі талапты екенін тілге тиек етті.
«Тіл-көзден сақтасын ол өте талантты. Ойлап тапқан жобасы да өте керемет. Өткен жылы Қанат осы грантты ұтып алғаннан кейін, енді күн панельдерін қайда орналастыратынымызды ойластырдық. Алдымен өзінің туған жері Тараз қаласына қоямыз ба деп ойладық. Бірақ қажетті құрал-жабдықтардың 80%-ы Алматы қаласында болды. Сосын баланың қанатын қимайық деп, Алматы облысы Түрген ауылындағы өзім басқарып отырған «Минаж» ШҚ аумағына орналастыруды жөн көрдік. Бұл жақтың ауасы да экологиясы да таза болғандықтан жақсы келді», — деді Минаж Мұхамеджан.
Сонымен қатар, ол қиындықтардың да болғанын жасырмады.
«Мемлекенттен бөлінген грант үш миллион теңге. Ал жобаның жалпы құны 4,5 миллионды құрады. Оған қажетті құрал-жабдықтар, тасымалдау және жұмысшылардың еңбекақысы кірді. Біз барынша қолдау көрсеттік. Себебі, теория бөлек, практика бөлек дегендей. Осы ретте өзіміздің өмірлік тәжірибемізбен бөлістік», — деп атап өтті ол.
Ендеше, жас та болса, бас болып ірі әрі маңызды жобаны қолға алып жатқан Қанатқа қанатың талмасын, талабың өрге жүзсін дегіміз келеді.
