Бүгін ол өңірлік коммуникациялар қызметінің алаңында мегаполистің жол инфрақұрылымын дамыту туралы мәлімдеді. Е. Абжаханның айтуынша, Алматы қаласының көше-жол желісінің ұзындығы 3096 шақырым, оның 234 шақырымына асфальт төселмеген.
«Біз 2025 жылға қарай қаладағы жақсы жолдардың үлесін 95%-ға жеткізуді жоспарлап отырмыз. Ол үшін 234 км жаңа жол саламыз, жыл сайын кемінде 200 км жолға орташа жөндеу жүргізуді жоспарлап отырмыз», — деді спикер.
Е. Абжахан жолдардың құрылысы туралы айта келе, Бұқтырма көшесі – Құлжа трактісі, Сейфуллин даңғылы – Жансүгіров көшесі және Саин көшесі – Мөңке би көшесі үш жолайрығының құрылысы бойынша жүргізіліп жатқан жұмыстар туралы баяндады. Бұқтырма – Құлжа трактісі көшелерінің қиылысындағы жұмыстар бекітілген кестеге сәйкес жүргізіліп жатыр. Жер учаскелерін сатып алу аяқталды. Қаражат толық көлемде бөлінді.
«1 қыркүйекке дейін эстакада мен пандустарды салу бойынша құрылыс-монтаж жұмыстарын аяқтап, сол арқылы барлық бағыттар бойынша көліктердің жүруін қамтамасыз ету жоспарланып отыр. Абаттандыруды ескере отырып, толық аяқтау мерзімін 2022 жылдың соңына дейін белгілеп отырмыз», — деді әкімдіктің ҚМБ өкілі. Сейфуллин даңғылы мен Жансүгіров көшесінің қиылысындағы жұмыстар да сатып алынған учаскелерде жүргізіліп жатыр. Тапсыру мерзімі 2023 жылға жоспарланған.
Саин — Мөңке би көшелеріндегі жол айрығының құрылысы бойынша дайындық жұмыстары басталды. Биыл коммуникацияларды қайта құру және айналма жолдарды салу бойынша жұмыстар жоспарланды. Жұмыс келер жылдың соңында аяқталады.
