Айымгүл ұстаз болуды бала кезден армандаған. Ол, әсіресе, қазақ тілін құштарлана оқып, ана тілін насихаттауды, балаларға үйретуді, тәлімгер болуды өзіне мақсат еткен. Бүгінде ұстаздың 4 жылдық еңбек өтілі бар.
«Ана тілін дамытуға ниеттеніп, өмірімді осы саламен байланыстырдым. ЖОО тәмамдаған соң тағы да оқуға түсіп, филология ғылымдарының магистрі атандым. Мектеп қабырғасында жүріп «Жас ақындар» байқауларына қатыстым. Оқушыларды тәрбиелеп, Абай, Шәкәрім, Мұқағали оқуларына апарып жүрмін», – деді Айымгүл Қадырменова.
Сондай-ақ маман мұғалімдерге мәртебе беріліп, қоғамдағы рөлі айқындалғанын алға тартып отыр.
«ҚР Президенті Қасым-Жомарт Тоқаев 2019 жылғы Жолдауында мұғалімдердің еңбекақысын жылда 25 пайызға көбейтіп, 4 жылда 100 пайыз көрсеткішке жетуді тапсырды. Содан бері мұғалімдердің әлеуметтік жағдайы жақсарды. Сонымен қатар педагогтерге мәртебе беріліп, қоғамдағы рөлі айқындалды», – деді ұстаз.
Жас маман мұғалімдерді төл мерекелерімен де құттықтап, ақ жарма тілегін айтты.
