Инвесторлар Алматы облысынан 20-30 гектарды құрайтын қолайлы жер телімін таңдау мүмкіндігін қарастыруда. Алдын ала есептеулер бойынша, инвестиция көлемі шамамен 200 миллион АҚШ долларын құрайды. Жұмыс істеп тұрған зауытты қуаттылығын кеңейте отырып, жаңа алаңға көшіру жоспарланып жатыр. Бұл өз кезегінде қазақстандық өнімнің ішкі нарықтағы орнын нығайтып, экспорттық жөнелтілімдердің үлесін арттыруға мүмкіндік береді.
«Бұл жоба облыстың, сондай-ақ жалпы еліміздің индустриялық дамуына серпін беріп, кемінде 1000 қосымша жұмыс орнын ашуға мүмкіндік береді», — деп атап өтті облыстық кәсіпкерлік және индустриялық-инновациялық даму басқармасының басшысы Қуаныш Бақытұлы.
Жоба 2030 жылдан кешіктірмей аяқталады.
Естеріңізге сала кетейік, «LOTTE Рахат» акционерлік қоғамы 75 жыл бұрынғы Қазақстандағы кондитерлік өнімдерді шығаратын ірі өндірушілердің бірі болып табылады. Кондитерлік өнімдердің алғашқы өндірісі 1942 жылы спирт зауытының аумағында соғыс кезінде Мәскеу мен Харьковтан эвакуацияланған жабдықты пайдалана отырып ұйымдастырылды.
«LOTTE Рахат» АҚ-да 4500-ге жуық адам жұмыс істейді. Өндіріс орындары Алматы мен Шымкентте екі учаскеде орналасқан. Бүгінгі таңда LOTTE Рахат АҚ ассортимент қоржынында 14 түрлі топқа жататын түрлі кондитерлік өнімдердің 400-ден астам атауы бар.
«LOTTE Рахат» АҚ – қант диабетімен ауыратындар үшін арнайы өнімдер шығаруды игерген Қазақстандағы жалғыз кондитерлік кәсіпорын. Бұл ассортимент құрамында калориясы төмендетілген шоколад, кәмпиттер, печенье және вафлидің бірнеше түрі және қантты баламалы табиғи шикізатпен алмастыру кіреді.
