Алматы облысы ТЖД Азаматтық қорғаныс басқармасының бастығы Ералы Разакуловтың айтуынша, биыл 18 адам суға батып кеткен. Оның 10-ы Қазақстанның басқа өңірінің тұрғындары болып шыққан. Дегенмен құтқарушылар 80 адамды өлімнен құтқарып қалған.
«Адамдардың өлімінің негізгі себебі – тыйым салынған жерде шомылу. Аудандарда коммуналдық және жеке жағажайлардың болмауына байланысты шомылу үшін белгіленбеген жерлерде демалатын адамдардың саны артты, бұл өз кезегінде қайғылы оқиғаларға әкеледі. Биылғы шомылу маусымында ескертулерді ескермеген 54 жеке тұлға ҚР ӘҚБтК-нің 412-бабы бойынша әкімшілік жауапкершілікке тартылды», — деді спикер.
Департаменттің жедел-құтқару жасағы су айдындарындағы оқиғаларға жедел ден қою үшін 30 жүзу құралын, 45 бірлік сүңгуір жабдықтары мен құтқару құралдарын сатып алған. Сондай-ақ 6 мобильді бекет пен шомылуға қауіпті аймақтардың 3 мобильді бекетінде кезекшілік ұйымдастырылған.
