Күні кеше Балатопар ауылының тұрғындары наразылық акциясына шығып, Қазақстан Президенті Қасым-Жомарт Тоқаевқа сумен жабдықтау мәселесін шешуді өтінген болатын. Ауылда 4 жылдан бері ауыз су жоқ, халық оны көрші елді мекендерден тасып ішуге мәжбүр. Сонымен қатар, осы жазда Топар өзені тартылып қалды.
Тұрғындар бұған латифундистердің жерлерін суаруға көп мөлшерде су жіберілуі себеп екенін айтады. Балқаш ауданы әкімдігінің қызметкерлері Alataunews.kz агенттігіне акцияға қатысушылармен сол күні аудан әкімінің орынбасары Б. Дәрібаев кездескенін хабарлады.
«Қапшағай су қоймасынан су беру қарқынының төмендігінен Іле өзеніндегі су деңгейі төмендеді, соның салдарынан Топар өзеніне су келмейді», — деп атады әкімдік судың тартылу себебін.
«Қазіргі уақытта каналдарды жабу арқылы Топар өзеніндегі су деңгейін көтеру жұмыстары жүргізіліп, өзенге су ағып жатыр», — деп түсіндірді әкімдік қызметкерлері.
Мәселенің мән-жайы анықталған соң акцияға қатысушылар тарады. Еске салайық, Балатопар ауылдық округі аудан орталығынан 156 км жерде орналасқан. Жергілікті халық саны 2 мыңнан асады. Тұрғындардың негізгі кәсібі — мал шаруашылығы.
