Кездесу барысында тараптар облыс орталығында жоспарланған бірқатар бірлескен жобаларды талқылады. Мәселен, халықаралық медицина және ғылым академиясы (International Academy of medicine and sciences) Қонаев қаласында мемлекеттік-жекешелік әріптестік тетігі бойынша 350 орындық облыстық көпсалалы мамандандырылған аурухана салуға ниетті. Жобаны іске асыру мерзімі — 2023-2026 жылдар.
Бұдан басқа, Алматы облысында 2023-2025 жылдарға арналған фармацевтикалық зауыт салу жоспарланған. Бұл ретте жеке инвестициялар көлемі 10 млрд теңге.
Қалада жүзеге асырылып жатқан үшінші жоба — қос дипломды бағдарлама (Үндістан – Қазақстан) бойынша халықаралық ақпараттық технологиялар университетінің ашылуы.
«Қонаев — даму әлеуеті зор қала және біз облыс әкімдігімен әлеуметтік жобаларымызды жүзеге асыруды жоспарлап отырмыз. Бұл үшін бізде жол картасы әзірленіп, қысқа мерзімде осы бағытта жұмысты бастауға ниеттіміз», — деп атап өтті академияның бас директоры Жұмағали Исмаилов.
Өз кезегінде облыс әкімі жоспарларды іске асыруда жан-жақты қолдау білдіріп, жобаның әлеуметтік бағытын атап өтті. Тараптар өзара түсіністік пен ынтымақтастық туралы тиісті меморандуммен өз ұстанымдарын бекітті.
