Басқа кездесулерден ерекше бұл шараның мақсаты – аяғын шалыс басып, тар қапасқа қамалғандардың рухтарын оятып, өмірге деген көзқарастарын өзгерту, тура жолға бастау.
Кездесудің басты спикерлері Қазақстан күрес лигасының президенті – Нұрбек Қарабала, кәсіби панкратионнан әлем чемпионы, жауынгерлік самбодан спорт шебері, NFS чемпиондық белбеуінің иегері – Ильдар Құдайбергенов және ҚР Президенті жанындағы жастар саясаты жөніндегі кеңестің мүшесі– Дамир Аманжолов.
Кездесу барысында шақырылған қонақтар өздерінің спорттық мансабы мен еңбек жолдары туралы әңгімеледі.
«Мұндай оқиғалар түзету мекемелеріндегі адамдарды ынталандырады. Біздің философиямыз адамзаттың серпілісіне бағытталған, сондықтан біз осындай орталарға жиі барамыз. Біз бостандыққа шыққан жауынгерлермен жұмыс істеуге және жаттығуға дайынбыз. Барлығына өз миссиямызды жеткізгіміз келеді»,-деп атап өтті Нұрбек Қарабала.
Жиын соңында мекеме басшылығы мен жазасын өтеушілер қонақтарға қызықты және танымдық кездесу үшін алғыс айтып, естелікке суреттер сыйға тартты.
