22 қарашада әлеуметтік желілерде ер адамның бейне хабарламасы шықты, ол соңғы 10 жыл Қаратал ауданындағы шаруа қожалық иесінің құлдығында болғанын мәлімдеді. Полицейлер видеоның авторы болған Үштөбе қаласының 44 жастағы тұрғынын іздеп тапты.
Ер адам, жұмыс беруші оның отбасы мүшелерінің құжаттарын заңсыз иемденгенін айтады.
«Қазір ер адамның өтініші ресми түрде тіркелді. Оған қатысы бар барлық адамдардан түсініктеме алынды. Яғни, шаруа қожалығының иесі, оның қызметкерлері, сондай-ақ жәбірленушінің туыстары. Құжаттарды заңсыз алу фактісі бойынша тергеу амалдары басталды. Қылмыстық іс аясында, сондай-ақ өтініш берушінің еңбекті пайдалануы туралы келтірген дәлелдері де тексеріліп жатыр. Ер адам және оның қызына көмек көрсетіліп жатыр. Тергеу барысында ол Талдықорған өңірлік «Әйелдерді қолдау орталығы» қоғамдық бірлестігінің өкілдері ұсынған тұрғын үймен, киіммен және тамақпен қамтамасыз етілген. Іс бойынша барлық тергеу әрекеттері Облыстық полиция департаменті басшылығының ерекше бақылауына алынды», — деді облыс ПД бастығының орынбасары Елдар Әбдікенов.
