Тұрғындардың бүкіл ауылды айналып өтуден басқа амалы қалмаған. Ал көлігі жоқ адамдар бірнеше сағат бойы батпақты жолсыз жерлермен үйлеріне жетуге мәжбүр болған.
«Қақпа қойып тастады. Ешкімді өткізбейді. Жақында ол мұнда үй салатынын айтты. Сонда біз енді не істеуіміз керек?», — дейді Бесағаш ауылының тұрғындары.
Бұл көшемен 50 отбасының тұрғындары үйлеріне қатынап келген. Енді оны көршілердің бірі сатып алып отыр. Бұл жаңалықты олар үш ай бұрын меншік иесі көшені жауып, қоршаған кезде ғана білген.
«Біз әкімдікке бардық. Олар бұл жер жеке меншік иесіне тиесілі болғандықтан, ештеңе істей алмайсыздар деді. Жер иесінің өзімен сөйлесуге тырыстық. Ол ештеңені өзгертпейтінін айтты», — дейді Бесағаш ауылының тұрғыны Әлішер Әукенбаев.
Бұл көше жабылған соң, тұрғындар жол бойымен ағып жатқан тереңдігі бес метр өзен арқылы қатынауға мәжбүр болып отыр. Ауыл тұрғындары өз күштерімен көпір салған.
«Осындағы жер учаскесін сатып алғанымызда бүкіл отбасымызбен қуанған едік. Үш миллионға алып, үй салдық. Енді міне тіпті көлік қоятын жеріміз жоқ. Оны ауылдың сыртына қалдырып, жаяу барамыз», — дейді Сырым Әділғазин.
Ауыл тұрғындары қалдырған көліктерін ұрылар тонап жатқанын айтып шағымданды. Бір-екі күн бұрын көліктің әйнегін сындырып, бөлшектерін ұрлап кеткен. Кінәлі табылмапты. Ал жергілікті билік көшені қайтару мәселесіне келгенде дәрменсіздік танытып отыр дейді ауылдықтар.
«Біз Ринатқа барлық ұсыныстарды айттық. Сәулетшімен ақылдасып, бәрімізге тиімді етіп өзгертейік дедік. Мүмкін болған нұсқалардың ешқайсына да келіспеді. Оның мемлекеттік актісі бар. Сондықтан жер учаскесін қоршап алды және ол әлі не істейтінін шешпегенін айтып отыр. Бірақ бұл оның құқығы», — дейді Бесағаш ауылдық округі әкімінің орынбасары Әлібек Рамазанов.
Жағдайды қалпына келтіру үшін жерді мемлекет балансына қайтару керек. Алайда қазіргі иесі өз аумағын қайтарудан бас тартты, дейді жергілікті әкімдік. Олар қазір проблеманы шешудің басқа жолдарын іздеп жүрміз деп сендірді.
