«13 қарашаға қараған түні Ішкі істер министрлігі Ұйымдасқан қылмысқа қарсы күрес департаментінің бөлімшелері Алматы қаласындағы ғимараттардың бірінде (Сәтбаев көшесінің бойында) жасырын казино ұйымдастырған қылмыстық топты ұстау бойынша арнайы іс-шара өткізді.
Тыйым салынған ойын мекемесі қаланың Бостандық ауданындағы көпқабатты үйдің жертөлесінде орналасқан. Адамдар құпия сөз арқылы кіргізіліп отырған.
Арнайы іс-шара кезінде казинода 20-дан астам келуші болды», — делінген полиция хабарламасында.
Арнайы операция кезінде 20-дан астам ойын жабдығы, ірі көлемдегі ақша, келушілердің аты-жөні жазылған тізім, ақшаның кіріс-шығыс жазбалары бар
құжаттама тәркіленді.
«Қылмыстық әрекеттен түскен кірістің шамамен сомасы күніне 5 миллион теңгеден асып отырған. Аталған дерек бойынша ҚР Қылмыстық кодексінің 307-бабы 1-бөлігімен (Заңсыз ойын бизнесін ұйымдастыру) қылмыстық іс тіркелді. Қазіргі уақытта казино иесін анықтап, жауапкершілікке тарту бойынша жедел шаралар жүргізіліп жатыр», — делінген полиция мәліметінде.
