Бұл басқосу жасөспірімдердің патриоттық рухын нығайту мақсатында арнайы ұйымдастырылды. Салтанатты шараға өңірдің түкпір-түкпірінен 250 делегат қатысты. Жиынның құрметті қонақтары ретінде ережесіз жекпе-жектен әлемнің үш дүркін чемпионы, панкратион мен бушидодан әлем кубогының иегері Ардақ Назаров, ережесіз жекпе-жектен әлем чемпионы Сырым Бектұрсын, дәстүрлі әнші Санат Қанатбекұлы шақырылды.
«Елімізде жастардың бойында отансүйгіштік рухты қалыптастыра отырып тәрбиелеуге ерекше көңіл бөлінеді. Осыған орай «Жас сарбаз» республикалық балалар мен жасөспірімдердің әскери-патриоттық қозғалысы құрылды», — деді басқарма басшысы.
Оның айтуынша, қазіргі таңда Алматы облысында жалпы саны 395 әскери-патриоттық клуб пен сынып жұмыс жасайды. Оның ішінде, 361-і «Жас сарбаз» клубы, мұнда 16 775 бала білім алса, барлығы 34 сыныпта 1 194 оқушы оқиды.
Сондай-ақ ол бірқатар мамандарды Алматы облысы білім басқармасының Алғыс хатымен марапаттады.
«Ардақ Назаровты бірі таныса, бірі танымас. Мен осы облыстың тумасымын, қарапайым отбасыдан шыққанмын. Әкем киномеханик, анам бухгалтер болды. Кеңес үкіметі тараған соң анам жұмыссыз қалып, әкем мектепте жұмыс жасады. Менің үлкен мақсатым ата-анама тірек болу, көмектесу еді. Өйткені, үйдің үлкенімін артымнан ерген бауырларым бар дегендей», — деді жиында балалармен ашық диалог құрған спортшы Ардақ Назаров.
Ол өзінің жетістікке жету жолымен бөлісіп, еңбекқорлық, отансүйгіштік, адамгершілік, жауапкершілік секілді адам бойындағы асыл қасиеттер туралы сөз қозғады.
Жиын соңында Іле ауданының кадет сыныптары көрініс қойып, жас өнерпаздар ән шырқады.
Сонымен қатар Мәдениет үйіне кіреберісте облыс оқушыларының спортта, оқуда жеткен жетістіктерінің дипломдары, медальдары қойылып, «работотехника» көрмесі көрермен назарына ұсынылды.
