Аудан әкімі Жасұлан Естенов қоғамдық көліктердің қолданысқа берілген күні атаулы оқиғаның басы-қасында жүрді. Ол 6 автобус бөлінген Кемертоған ауылындағы оқу ордасына арнайы барып қайтты. Тұрғындармен тілдескен аудан басшысы ауыл әкіміне мектеп алдындағы жол қозғалысын үнемі бақылауда ұстауды тапсырды.
Жергілікті білім бөлімінің мәліметінше, автобустардың екеуі Жамбыл ауылындағы №2 орта мектепке, қалғаны бір-бірден Б.Қосынов, Ушинский және Қырғауылдыдағы оқу ошақтарына бөлінді.
Айта кетейік, 2020 жылы Алматы облысы әкімінің бастамасымен өңірдегі білім ордаларына жалпы саны 71 автобус сатып алынды. Бірақ, сол жылы коронавирус инфекциясының жаппай таралуына байланысты қолданысқа берілу уақыты кешіктіріліп, бірқатар мәселе туындады. Түйіткілдің түйіні 2022 жылдың күз айында ғана тарқатылды.
