Медициналық мекеменің қызыл лентасын Кеген ауданының әкімі Талғат Байедилов қиды.
«Биыл Қарқара ауылында жақсылық мол. Фельдшерлік-акушерлік пункттен бөлек, елдімекенде спорт зал салу жоспарланып отыр, ал Мәдениет үйінің құрылысы жүріп жатыр. Сонымен қатар Кеген аудандық ауруханасына, Жалаңаш, Алғабас ауылдарындағы ауруханаға күрделі жөндеу жүргізілді. Дәл осындай ФАП ғимараты Ақай ауылында да салынды», — деді аудан әкімі.
Оның айтуынша, аталған мекеме қажетті медициналық құрал-жабдықтармен қамтылған. Мұнда бір мезгілде 30 адам мейірбикенің алғашқы көмегіне жүгіне алады. Және тіс дәрігері тұрақты қызмет етеді. Пунктте 1 жедел жәрдем көлігі бар.
Салтанатты шараға аудандық мәслихат депутаттары, қоғамдық кеңес мүшелері, ауыл тұрғындары қатысты.
Айта кетейік, бүгін Алматы облысының түкпір-түкпірінде «Республика күні» мерекесіне орай 17 ауқымды іс-шара өтті.
