Бұл шара Алматы қаласындағы «Нұр-Мүбарак» университетінің қабырғасында өтті. Маңызды құжатқа зерттеу орталығының директоры Сағыныш Жаңабай мен «Діни экстремизмге қарсы іс-қимыл академиясының» директоры Тимур Нүсіпханұлы қол қойды.
«Биыл 29 қыркүйекте «Нұр-Мүбарак» университетінің жанындағы діни экстремизмге қарсы орталық академияға айналды. Көп ұзамай, біз олармен ортақ мәмілеге келдік», — деді зерттеу орталығының директоры Сағыныш Жаңабай.
Оның айтуынша, аталған құжат бірнеше мақсатты көздейді:
• діни экстремизм және терроризмге қарсы бағытталған іс-шараларды өткізу (брифингтер, тренингтер, аудан, ауыл, қала тұрғындарымен кездесу ж/е т.б);
• өзара тәжірибе алмасу;
• ғаламтор кеңістігіндегі деструктивті контенттердің таралу аясын шектеу бойынша талдау, мониторинг жұмыстарын жүргізу;
• әлеуметтік желілерде қарсы насихаттық шараларды жүзеге асыру;
• дін саласындағы өзекті мәселелер туралы ресми ақпаратты бірлесе отырып дайындау.
Айта кетейік, діни экстремизмге қарсы орталық 2016 жылдан бері жұмыс істеп келеді.
