Экологтар Каспий су аймағын 5 тонна қоқыс пен балық аулайтын тордан тазалады.
Гидробиология және экология институты Түпқараған түбегінің солтүстік жағалауындағы және Маңғыстау шығанағының іргелес су айдынындағы балық аулау торлары мен қоқыстарды жинады.
Басты мақсат — Каспий итбалықтарының Итбалықтар аралы мен теңіз айдыны жағалауына қауіпсіз қоныс аударуын қамтамасыз ету және су алабын зерттеп, таза ұстау. Тексеру және тазарту жұмыстарын Маңғыстау облысының балық инспекциясы басқармасымен және «Эко Маңғыстау «ҮЕҰ-мен бірлесіп жүргізілді.
«Eco Waste Aqtau» ЖШС тасталған балық аулау торлары мен теңіз қоқыстарының көлемін бағалауды және кәдеге жаратуға беруді жүзеге асырды.
Жобаны іске асыруға Маңғыстау облысының табиғи ресурстар және табиғат пайдалануды реттеу басқармасы қолдау көрсетеді.
Еске салайық, былтыр Каспий теңізінің қазақстандық секторында экспедиция мүшелері Маңғыстау шығанағының айдыны мен іргелес аралдардан теңізге тасталған салмағы үш тоннадан асатын жұқа даражіптен жасалған ау жинаған болатын.
Сондай-ақ, бекіре тұқымдас балықты аулайтын тыйым салынған құралдың үш тоннасы алынды. Ол кезде балықтар мен итбалықтар су түбіндегі торға түсіп өліп қалған еді.
